María Lago Bernárdez
Francesca Woodman
3 de abril de 1958 - 19 de xaneiro de 1981
Self-Portrait at 13. Francesca Woodman, 1972
Francesca Stern Woodman naceu o 3 de abril de 1958 en Denver, Colorado (Estados Unidos), nunha familia adicada ao mundo artístico. Aínda que a súa primeira infancia se desenvolve no país norteamericano, entre 1965 e 1966, os Woodman establécense en Italia, preto de Florencia, converténdose este nun período que marcará de xeito directo a vida de Francesca. Posteriormente volverá á Toscana todos os veráns, onde mercan unha granxa. Italia serve de fonte de inspiración para toda a familia coas súas paisaxes, museos e arquitecturas, e será alí onde a pequena de dous irmáns inicie as súas andaduras no debuxo.
En 1972, mentres estuda no internado de Abbott Academy, Massachusetts, Francesca achégase por primeira vez á fotografía, da que queda profundamente prendida. A partir dese momento converterase no seu medio de expresión preferido e xa non deixará a súa cámara ao longo de toda a súa produción creativa. Ese mesmo ano, con trece de idade, realiza o seu primeiro autorretrato, que xa deixa entrever a súa liña estética e a forza que cobrará a figura nas súas instantáneas.
En 1975 comeza a estudar na Rhode Island School of Design (RISD), onde desfruta dunha bolsa na súa querida Italia, esta vez en Roma, experiencia profundamente inspiradora de novo para a súa obra. Nese contexto relaciónase con novas voces do panorama artístico e literario e realiza a súa primeira exposición individual, así como outras colectivas. O seu último ano de estudos volve aos Estados Unidos, desta quenda a New York, onde vivirá ata a súa morte temperá en 1981.
Mediante a experimentación da propia técnica fotográfica e o uso do seu corpo como obxecto principal das súas imaxes, Woodman cuestiona de xeito radical o papel da figura feminina baixo a mirada da cámara, resignificándoo. É ela quen decide como suxeito onde colocar o obxectivo, que partes mostrar e dende que perspectiva a observamos. Os xogos de luces e sombras, a composición de elementos e o uso de reflexos e movemento reflicten un estilo etéreo e misterioso, enchendo o espazo de texturas e complexidade.
A temática das súas fotografías con pinceladas surrealistas e o uso de iconografía simbolista como poden ser as cunchas e as flores recordan á pintura de Maruja Mallo e á fotografía de Man Ray, así como a performers coetáneas da talle de Ana Mendienta, Yoko Ono ou Marina Abramovic, pertencentes a un grande grupo de mulleres artistas que empregan o corpo na súa obra como medio de expresión principal.
Se queredes coñecer máis sobre a produción artística de Francesca Woodman, animámosvos a pesquisar na rede, en revistas ou en libros especializados. Agardámosvos no artigo de Mulleres na Sombra do mes que ven!
