A astronomía foi unha das súas grandes paixóns. Wang Zhenyi escribiu varios tratados nos que explicaba, de xeito claro e preciso, fenómenos como as eclipses, as fases da lúa ou o movemento dos planetas. Para explicar as eclipses solares, chegou a construír modelos físicos usando unha lámpada, unha bola e un espello, co fin de amosar como a lúa pode ocultar o sol. Así, conseguiu traducir a complexidade do ceo en palabras comprensibles para o pobo, afastándose da superstición e achegándose á observación empírica, ao estilo das científicas modernas.

No campo das matemáticas tamén fixo achegas notables. Reescribiu e simplificou obras complexas coma as do matemático Mei Wending, para que puidesen ser comprendidas por persoas con menos formación. Tratou temas como a multiplicación, as fraccións, os triángulos ou o teorema de Pitágoras. Fíxoo cunha linguaxe directa e cun propósito claro: democratizar o coñecemento.

Pero Wang Zhenyi non foi só científica. Tamén foi poeta. A través da poesía expresou a súa visión crítica do mundo e a súa determinación por superar as barreiras que a sociedade impoñía ás mulleres. Nun dos seus versos máis coñecidos escribiu:

“Está feito para crer,
que as mulleres son iguais aos homes;
Non estás convencido,
de que as fillas tamén poden ser heroínas?”

Consciente das limitacións do seu tempo, Wang defendía a educación como ferramenta de emancipación. Inspirada polos ideais do pensador Yuan Mei —quen tamén apoiaba a educación feminina—, promoveu o dereito das mulleres a estudar e cultivar o pensamento crítico. Consideraba que o saber debía estar ao servizo da xustiza, da igualdade e da liberdade.

A pesar da súa morte prematura en 1797, con tan só 29 anos, Wang Zhenyi deixou unha pegada inesquecible. As súas obras, tanto científicas como literarias, seguiron circulando e influíndo nas xeracións posteriores. Nun tempo en que o papel da muller era relegado ao ámbito doméstico, ela demostrou que unha mente libre pode abrir camiños mesmo nos contextos máis adversos.

Wang Zhenyi foi, sen dúbida, unha muller adiantada ao seu tempo. Unha figura que desafiou a tradición cunha pluma, un telescopio e unha vontade inquebrantable de saber. A súa historia lévanos a reflexionar sobre cantas outras voces, coma a súa, foron silenciadas e canta ciencia, poesía e sabedoría se perdeu pola discriminación de xénero. A súa vida é unha lembranza poderosa de que o coñecemento non entende de xénero nin de límites impostos.

Hoxe, Wang Zhenyi é lembrada como unha pioneira da ciencia, unha muller valente que iluminou o ceo e abriu o camiño para que outras puidesen seguir estudando as estrelas.