Julien Courcier Cortegoso

Hai receitas que nacen do pracer de acender o lume cando fóra xa cheira a chuvia e os días van minguando. Esta compota é unha desas pequenas creacións sen pretensións, pensada para desfrutar do outono con algo doce e suave. A mestura de mazás e cabaza dá como resultado unha textura cremosa, de sabor equilibrado, que serve tanto para untar nun pan torrado como para acompañar queixos ou sobremesas.

Ingredientes:

• 1 mazá verde tipo Granny Smith
• 4 mazás pequenas tipo Gala
• 80-100gr de cabaza tipo violín
• 150 ml de auga
• Un chisco de zume de limón (5–10 ml)
• 1 culler de azucre branco
• 1 culler de mel
• 1 culler de ron

Notas sobre os ingredientes

A combinación de mazás non é arbitraria: a Granny Smith, de polpa firme e acidez marcada, achega frescura e evita que o resultado quede estoxadizo, mentres que as Gala compensan cunha dozura natural e un aroma máis floral.

A cabaza tipo violín, pola súa parte, achega corpo e suavidade á compota, ademais dun ton alaranxado atractivo.

O zume de limón cumpre unha dobre función: prevén a oxidación da mazá e potencia o sabor final.

A proporción de doce pode variarse ao gusto: menos azucre e máis mel darán un resultado máis meloso e rústico; máis azucre fará unha compota máis limpa e de sabor directo.

Elaboración paso a paso

1. Preparación das froitas
Pelamos, descarozamos e cortamos as mazás en anacos pequenos. Extraemos a pulpa da cabaza e troceámola.

2. Cocción inicial
Poñemos nunha pota as mazás, a cabaza, auga, azucre e zume de limón. Cociñamos a lume baixo durante uns 15 minutos, tapando parcialmente. O obxectivo é que a mazá se desfaga e a cabaza se abrande sen chegar a caramelizar.

3. Textura e punto de cocción
Cando as froitas estean tenras, esmagamos cun tenedor ou cun pasapuré, segundo a textura desexada. Continuamos a cocción durante 10 minutos máis, ata que a auga se evapore lixeiramente e a mestura adquira consistencia. Se a cabaza segue algo firme, podemos alongar un pouco o tempo.

Nota: O tempo de cocción pode ser algo máis longo que o dunha compota de mazá normal debido á cabaza que precisa de máis tempo para abrandar.

4. Toque final
Retiramos do lume e engadimos o mel e o ron. Mesturamos ben mentres a compota aínda está quente, de xeito que os aromas se integren sen que o alcohol se perda por completo.

5. Repouso e conservación
Deixamos arrefriar completamente antes de gardar. Pódese conservar na neveira ou conxelar en porcións pequenas para uso posterior.

Notas finais e consellos

Se preferimos unha textura máis lisa, pódese triturar co batedor ata obter unha crema fina.

Engadir un chisco de canela, noz moscada ou cravo reforzará o carácter outonal da receita.
    
O ron pódese substituír por zume de laranxa, unha pinga de vainilla se se quere unha versión sen alcohol ou calquera outro tipo de licor similar.