Ilustracións: Lorena de Roo Rivadulla
Redacción: Julien Courcier Cortegoso
Horóscopo - Febreiro 2026
Corzo - Do 24 de decembro ao 20 de xaneiro
Este mes colleitas o que sementaches. O problema? Que non recordas ter sementado nada. A calma será proveitosa, pero non te confíes: o sol de abril é mentireiro e a túa pel aínda está en modo inverno. Alguén pediráche favores e ti dirás que si por compromiso. Arrepentiraste antes de rematar a frase.
Compatibilidades: O Raposo tentará aproveitarse da túa boa fe. Non aviso máis.
Donicela - Do 21 de xaneiro ao 17 de febreiro
A terra está fértil e ti tamén, pero non no sentido maternal: é que vas estourar de tantos pendentes. Abril ofréceche a oportunidade de rematar algo que deixaches a medias en xaneiro. Valora poñerlle punto e final dunha vez. O sol comeza a apertar e a túa palidez invernal… está lista para lucirse.
Compatibilidades: A Bolboreta entenderá os teus ritmos. A Serpe, pola contra, vai arrastrarte aos seus melodramas.
Serpe - Do 18 de febreiro ao 17 de marzo
A calma chega ao teu signo, cousa canto menos… sospeitosa. Goza deste val de paz porque en canto a primavera avance, volverás ser a que queima pontes por deporte. Aproveita para non destruír nada nin a ninguén. Unha oportunidade laboral aparecerá a mediados de mes; coida a túa lingua.
Compatibilidades: O Cabalo compartirá a túa tregoa. A Píntega, en cambio, vai crer que a túa calma é cuestión de debilidade.
Raposo - Do 18 de marzo ao 14 de abril
O lume baixa as súas chamas, pero non baixes a garda: é só que o vento cambiou. Terás un respiro, pero será deses respiros que preceden a que che caia unha maceta na cabeza. Aproveita para planear os teus próximos ardides sen facer ruído. Alguén che pedirá contas por algo que fixeches hai meses...
Compatibilidades: O Lobo seguirá os teus plans. A Donicela detectará as túas intencións antes de que as teñas sequera.
Vaca - Do 15 de abril ao 12 de maio
Prepárate para que todo o mundo che pida favores. O teu traballo de meses comeza a dar resultados e iso chamará a atención de quen non moveu un dedo. Aprende a dicir que non, aínda que che custe. Deixa o bronceado para máis adiante. Non fagas tonterías.
Compatibilidades: O Miñato trae moita estabilidade. A Troita vai ser unha áncora que flipas ーe non no bo sentidoー.
Píntega - Do 13 de maio ao 9 de xuño
Tes un baleiro interior. Pode ser emocional ou pode ser que levas tres días esquecendo comer. Os asuntos emocionais requirirán a túa atención, pero ti farás o de sempre: deixar que flúan. Se che falta algo, revisa o estómago: ás veces a fame disfrazase de angustia existencial.
Compatibilidades: A Garza será a túa compañeira existencialista. O Cabalo encherá o baleiro con… opinións non solicitadas.
Petapau - Do 10 de xuño ao 7 de xullo
Por fin podes estirar as ás! Abril tráeche liberdade e unha brisa que che vai sentar mellor que un día de rebaixas. Coincidencias da vida, este mes vai ser o teu mellor momento. Nada que ver con que esta revista estea de aniversario. Voa, Petapau, voa! Pero sen perderte, que logo o GPS non funciona.
Compatibilidades: O Miñato será excelente compañeiro de voo. O Corzo mirarate con cara estraña. Non intentes entendelo.
Cabalo - Do 8 de xullo ao 4 de agosto
Tes unha enerxía incontible, pero non a confundas con produtividade: vas darte moitos golpes porque o teu ímpeto supera a túa planificación. Aproveitas a calma dos signos de lume para descansar, pero ti non sabes estar quedo. Coidado con romper algo sen querer. Vai pasar.
Compatibilidades: O Lobo apoiará a túa causa. A Donicela xa está farta das túas reivindicativas teimas.
Troita - Do 5 de agosto ao 1 de setembro
Tes unha sensación de profundo baleiro. Pode ser unha bágoa contida ou simplemente que o ketchup acabou e ninguén deu aviso. A marea está baixa, así que non agardes grandes emocións pero tampouco grandes desastres. Non deixes que coa calma esquezas o paraugas no día máis chuvioso.
Compatibilidades: A Vaca entenderá o teu deserto emocional. O Lobo tentará afogarte ーde múltiples formasー.
Garza - Do 2 ao 29 de setembro
A falta de algo vai ser o teu lema. Pode ser que botes de menos a alguén ou que simplemente che falte a tapa dun tupper. Non deixes que iso che leve a facer compras impulsivas. Tampouco a mandar mensaxes ás 3 da mañá. Ningunha das dúas cousas é recomendable. Por favor. Calma.
Compatibilidades: A Píntega será a túa terapeuta de balde. O Raposo crerá que o teu baleiro é unha oportunidade para enchelo de favores.
Bolboreta - Do 30 de setembro ao 27 de outubro
As ás xa están fóra do casullo. Vas coller aire fresco, liberarte das amarras invernais e probablemente tamén coller un arrefriado por andar a voar con pouca chaqueta. Aproveita a liberdade, pero coidado: o aire pode levarche onde non querías ir.
Compatibilidades: O Cabalo entenderá as ansias de liberdade. A Serpe vai querer converter o teu voo nunha queima controlada.
Lobo - Do 28 de outubro ao 24 de novembro
A tormenta aínda non chegou pero xa se está formando. Terás unha calma sospeitosa que che fará preguntarche se perdiches a túa esencia. Non te preocupes: en canto a primavera se asente, volverás a ser o centro de cada polémica. Aproveita para durmir.
Compatibilidades: O Petapau acompañarache no silencio. O Corzo fuxirá de ti coma dun incendio forestal.
Miñato - Do 25 de novembro ao 23 de decembro
O vento sopra ao teu favor e iso significa que podes dicir o que pensas sen que che estoupe na cara. Ata agora. Porque o aire é traizoeiro e o que hoxe che impulsa, mañá pode traerche unha factura da luz. Practica a arte do silencio, aínda que che doa.
Compatibilidades: O Lobo será o teu valedor. A Garza vai pedirche que baixes a unha altitude máis… humana.
Velaquí o horóscopo satírico de abril e o derradeiro neste mesmo formato. Para este segundo ciclo de publicacións de Petapau decidimos simplificar o horóscopo e publicalo de forma estacional no canto de mensual.