O ciclo dos Maios non é unha rareza illada no mundo: forma parte dun fenómeno universal, unha resposta ancestral da humanidade á forza dos ciclos naturais. Desde tempos antigos, en practicamente todas as culturas, o ser humano sentiu a necesidade de celebrar o renacer da vida, o paso das estacións e a renovación da natureza.

É certo que en latitudes temperadas, coma a galega, a chegada da primavera ーcoa súa explosión de flores, cores e vidaー constitúe un momento especialmente simbólico, motivo de festas e rituais. Non obstante, en moitas outras rexións do planeta, especialmente nas zonas tropicais, onde as estacións non se diferencian en catro etapas, senón en dúas épocas ーa seca e a de choivasー, as celebracións naturais poden centrarse noutros momentos clave do ciclo anual.

Así e todo, o fío condutor permanece inalterable: o recoñecemento e a exaltación dos ritmos da natureza, sexa no reverdecer das campías europeas, no inicio da tempada das flores en África, ou no renacemento espiritual que trae a fin do inverno en Asia. O espírito que anima os Maios galegos ten ecos profundos noutras celebracións repartidas polos cinco continentes.

Así, atopamos festas que, malia a diversidade de formas e expresións, comparten esa mesma esencia que atopamos nos Maios galegos como son: 

Beltane (Irlanda e Escocia)
É unha antiga festividade celta celebrada na noite do 30 de abril ao 1 de maio, que marcaba a transición á metade luminosa do ano. Acendíanse grandes fogueiras para protexer o gando e garantir a fertilidade dos campos. O lume, símbolo de purificación e vida, xunto coa honra á natureza, sitúan Beltane coma un claro parente espiritual dos nosos Maios.

Floralia (Antiga Roma)
Na Roma clásica, Floralia era o festival dedicado a Flora, deusa das flores e da fertilidade. Celebrábase entre finais de abril e comezos de maio con xogos, teatro, desfiles e adornos florais. A exaltación da vexetación e da sexualidade como forza vital ten moitas conexións simbólicas co espírito dos Maios galegos.

Fête du Muguet (Francia)
En Francia, o 1 de maio celébrase regalando ramiños de muguet ーcampaíñas de maioー como símbolo de boa sorte e felicidade. A tradición, aínda viva, herda o costume de asociar a floración e o renacer natural co desexo de prosperidade, do mesmo xeito que os Maios celebran a abundancia e o ciclo da vida.

Ederlezi (Pobo romaní)
Para o o pobo romaní, en relación ao día de San Xurxo ー23 de abrilー, celebran o retorno da primavera, sendo esta unha das súas festas máis grandes. Mestura tradicións cristiás con antigos ritos pagáns: a decoración de casas con ramas verdes e flores, a danza do kolo ou a bendición dos campos. Algúns rituais inclúen o baño en auga con flores. Todo un culto á natureza renacida que irmanda ao pobo romaní coas nosas celebracións galegas.

Hanami (Xapón)
O Hanami, a contemplación das flores de cereixeira, é quizais unha das celebracións primaverais máis coñecidas do mundo. A través da beleza efémera das flores, os xaponeses celebran a renovación da vida, a súa fugacidade e a esperanza do futuro. Un sentimento que, aínda con formas distintas, conecta coa nosa admiración pola natureza que se expresa nos Maios.

Holi (India e Nepal)
O festival de Holi é unha explosión de cor e alegría que celebra a chegada da primavera. As persoas lánzanse pos de cores, danzan, cantan e esquecen as diferenzas sociais nunha festa que simboliza a renovación da vida e a igualdade. A forza vital que transmite Holi é universal: o desexo de comezar de novo coa chegada da estación verde.

Festival das Flores (Madeira)
Especialmente en Funchal ーa capitalー, a fin da estación de choivas e o inicio da floración celébrase con festivais cheos de música, danzas e adornos florais; comezando por un impresionante tapiz de flores e desfiles de carrozas florais. Unha vez máis a natureza marca o ritmo da vida e convértese en protagonista da festa.

Powwows primaverais (indíxenas norteamericanos)
Os pobos indíxenas norteamericanos celebran powwows especiais coa chegada da primavera. Estes encontros festivos inclúen danzas, músicas e rituais de agradecemento á natureza. Coma nos Maios, o vínculo espiritual coa terra e o respecto polos seus ciclos son fundamentais nestas celebracións.